Author name: IlocanoHymns.com

Dios Ama, naasi Tulong itdem cadi, Cadacami; Dios a nagloriaan Sica ti mangaywan Bantayan nacam ngad’ Ti inaldaw. Dios Ama, naayat Inca cad’ ipangag Toy cararag; Bendicionmo ngarud Asim di mabubos, Urayenmi Jesus A magun-od. Espiritu Santo, Liwliwa ken dungngo Ti itedmo; Sica ti agari Itoy puspusomi Sica ti napili A kiredmi. Personas tal-loda, Trinidad nangina Maymaysada; O Dios a nabileg Dayaw incam itden, Kenca incam amin A tumaclin.

O Dios a kinabadangmi Sicat’ namnamami; Iti dawel talgeddaca, Balay a nalagda. Salinongam dayta tronom, Dagiti sasantom; Umanayen ta tackiagmo, Sarkedmi a pudno. Idi awan pay tuturod, Wenno langat’ daga; Dioscan idi di maputpot, Nga awan inggana. Kencat’ rinibu a tawer, Lumabas cas malem; Ababa cas ti rabii, No init nganngani. Cas laeng ayus ti tiempo, Mangyanud iti tao; Darepdep a no bumigat, Mabati ken lipat. O Dios a kinabadangmi, Sicat’ namnamami; Sicat’ nakired a sarded, Balay a natalged.

Nagsam-iten ti agtalec, Ken Jesus a napateg Ket no patien ti saona, Ragsac addanto kenca Coro: Jesus, Jesus, nagsami-ten, Napateg a carcarim, Ti saom macapnep caniac Kenca ngad’ agtalecac. Nagsam-iten ti agtungpal, Bilin mangisalacan; Mapagtalcan ti darana, Mangugas iti damca. Wen, nasam-it ti agtulnog, Ken Jesus Anac ti Dios, Talna, ragsac ken inana, Ti magun-od Kencuana. Agragragsacac ken Jesus, Gayyem ken Manubbot Cumuyogacto Kencuana, Nga awan ti inggana.

Inton aramidco ti malpas itoy a biag, Ni nasam-it a turog alaennac Makitacto ti rupa ni Jesus a naraniag Ket naragsacto nga umawat caniac Coro: Mailasinconto ni Jesus, Ta naraniag ngem ti init Mailasinconto ni Jesus Amangan a ragsacto daytoy pusoc. O, no malagipco nga iti masacbayan Incari ni Jesus nga isu umay Cayatcon no makitac daydiay nariag nga adlaw, Tapno innac agtaengen diay gloria. Idiay arpad ti Ama a nadiosan papanac Pagpanawacton rigat daytoy a biag; Awanton ladingit ken ti adu a dandanag Sasanto ken ni Jesus to ti caduac.

Ti Payacna natalged paglinongan No nasipnget ket allon naraggas Isut’ pagtalcac ammoc aywanannac, Siac ti anacna ta sinubbotnac. Coro: Paglinongac ti payacna, Ayatna diac sumina Agtaeng cararuac salinongna Iti awan inggana. Ti Payacna camang ti lumlumdaang, Paginanaan ti nabannogan No naladingit unay toy cararuac, Idiay liwliwa innac masarac. Ti linongna ragsac innac masarac, Inggat’ amin a suot lumabas, Natalgedac ket awan ti pagbutngac Ni Jesus agnanayon ti caduac.

 Pudno a ni Jesus natay Gapu ti managbasol, Nupay sawenmi masansan Incam sawen itan. Coro: Nagloriaan a Damag Isacnapmi siayat, Pacaisalacanan Pammati ken Jesus. Nagtutuoc, nagsagaba Datay ti inispalna, Awatennatay ti Ama; Gapu iti Anacna. Daculapna naabutan, Rupana natupraan, Ita ni Cristo agparang Mangibaet cadatay. Ket daytoy met la a Jesus, Cadatay agsublinto, Ket dagitinto nasubbot Kencuana agbiagdanto.

Pagay-ayatco mangngegan Sao a mamagbiag, Buyaec man ti imnasdan Sao a mamagbiag; Sao ingget imnas Ita isuronac. Coro: Ti sasao a naragsac (Maulit) Sao a mamagbiag) Ni Cristo iccannatayo Sao a mamagbiag, Inna yawis cadatayo Sao a mamagbiag; Rangcap a nawaya  Sagut ti Namarsua. Evangelio umaw-awag Sao a mamagbiag, Ti pacawan inna yetmag Sao a mamagbiag; Ni Jesus mangispal Innac ngad’ idalan.

Captem ti Biblia, uray no mapucaw Ti aniaman kenca a sanicuam; Carina dica pucawen namnanam Inumem ubbogna a nalit-aw. Coro: Captem ti Biblia, Captem ti Biblia, Captem ti Biblia, Mangidalan Captem ti Biblia napateg a cucua Mangted dayaw, mangispal ti parsua Ti gatad awan umasping kencuana Sapulem ita, O Cararua. Isut’ silaw dagiti nasipngetan, Idalanna dagiti napucaw; Managbasol inda pangnamnamaan, Isut’ libro a casayaatan.

Adda ayus a mangsibug Ti nasudi nga ilit’ Dios, Ayat ragsac di mabubos Agnanayon agburayoc. (Maulit) Daytoy ayus masarita Isut’ Saom a nangina; Tured ken talnat’ itdenna Mangted pigsa ti cararua. Uray agdackel ti allon Pusomi dinto agpulcoc; Uray agdackel ti allon Awan butengmi a pulos

Santa Biblia, Nadiosan, Gamengco nga icutan; Sicat’ pacasaracan Ti Biag a na Cristianoan. Bibliat’ pacaadalac, Biag ni Jesus nga ayat; Iturong idalannac Nalawag a pagnaac. No ladingitcot’ dumteng Siac cad ti liwliwaem, Pammatic inca itden A kiredco ken talged. Biblia ti mangibaga Ragsac a naiduma, O, napateg a Biblia Idalannac ngad’ ita.